Gənc Vətənpərvərlər Birliyi (GVB) ““Narkomaniyaya yox - Sağlam həyata hə” devizi altında preventiv tədbirlərin və idman yarışların keçirilməsi” adlı layihə çərçivəsində Nizami rayon 10 saylı tam orta məktəbdə Respublika gününə həsr olunmuş “Ey yüksələn yeni nəsil, gələcək sizindir.

Onu yüksəldəcək və davam etdirəcək sizlərsiniz”, “Narkotiklərlə mübarizə mənəviyyatımızın xilası deməkdir” mövzularında elmi - nəzəri, praktik konfrans keçirilib.
Tədbirdə layihə üzrə təşkilat komitəsinin üzvləri, könüllülər, ziyalılar, idman ictimaiyyətinin nümayəndələri, tələbələr, QHT və KİV nümayəndələri iştirak ediblər.

qhtxeber.az-ın məlumatına görə, əvvəlcə Ulu öndər Heydər Əliyevin və şəhidlərimizin ruhu bir dəqiqəlik sükutla yad edilib. Sonra layihə üzrə koordinator N. Quliyev Respublika günü münasibəti ilə tədbir iştirakçılarını təbrik edib. Bildirib ki, layihənin məqsədi cəmiyyətin diqqətini narkomaniya və pis vərdişlərlə mübarizəyə yönəltmək ,Qazanılmış İmmun Çatışmazlığı Sindromuna (QİÇS)-ə yoluxmanın səbəbləri barədə gəncləri məlumatlandırmaq, gənclərin asudə vaxtını səmərəli təşkil etməkdən ibarətdir.

Məktəbin direktoru L. Məmmədova bildirib ki, xalqımızın müstəqillik arzusunu Ulu öndər Heydər Əliyev gerçəkləşdirib. 1990-cı il noyabr ayının 17 –də Heydər Əliyevin sədrliyi ilə öz işinə başlayan Naxçıvan Ali Məclisinin sessiyası tariximizdə Azərbaycan dövlətçiliyinin dirçəliş prosesinin həyata keçirilməsi ilə bağlı bir çox məsələlərin müzakirə olunması, ölkəmizi müstəqilliyə aparan yolda tarixi qərarların qəbul edilməsi ilə əlamətdar olub.
GVB-nin sədri M. Əliyev qeyd edib ki, narkomaniya təkcə xəstənin özünə deyil, bütün cəmiyyətə böyük zərər vuran sosial xəstəlikdir.
Təqaüddə olan sabiq polis işçisi İ. Əliyev son zamanlar yeniyetmələrin siqaretə və spirtli içkilərə meyllərinin artmasından söhbət açıb. O, bildirib ki, gənclər arasında narkomaniyaya qarşı mübariz olmalı və bu sahədə ümumtəhsil məktəbləri, ictimaiyyət, gənclər təşkilatları və QHT-lər maarifləndirmə işlərini gücləndirməlidir.

Tədbirdə digər çıxış edənlər dövlətimizin qazandığı bütün uğurların Ulu öndər Heydər Əliyevin zəkası, müdrikliyi, uzaqgörənliyi sayəsində əldə edilməsindən danışıblar. Natiqlər həmçinin narkomaniyanın fəsadlarından ətraflı danışaraq diskussiyalar aparıblar. Tədbir sinif otaqlarında davam etdirilib verilən suallar cavablandırılıb.

Qeyd edək ki, layihə Azərbaycan Respublikasının Prezidenti yanında Gənclər Fondunun maliyyə dəstəyilə həyata keçirilib.
Hamlet

http://qhtxeber.az/news/a-33992.html