Prezident yanında QHT-yə Dövlət Dəstəyi Şurasının maliyyə dəstəyi ilə Gənc Vətənpərvərlər Birliyi (GVB) "Gənclər arasında milli hərbi vətənpərvərlik hislərinin gücləndirilməsi istiqamətində kompleks tədbirlərin həyata keçirilməsi” adlı layihə çərçivəsində Milli Karate Federasiyası ilə birgə "Hərbi vətənpərvərlik və vətəndaşlıq tərbiyəsində psixoloji amillərin təbliğində təlimatçı məşqçilərin rolu” mövzusunda elmi nəzəri praktik konfrans və karate üzrə təlim keçirilib. 

GVB-nin mətbuat və informasiya şöbəsindən AZADİNFORM-a verilən məlumata görə, konfransda çıxış edən layihə rəhbəri ənənəvi karate üzrə fəxri bədən tərbiyəsi və idman işçisi IV dan qara kəmər ustası M. Əliyev qeyd edib ki, layihə çərçivəsində 2015-ci ildə Bakı şəhərində keçiriləcək Avropa Olimpiya Oyunları ilə əlaqədar olaraq idman tədbirlərin keçirilməsinə üstünlük veriləcək. 

MKF-nin prezidenti Y. Bəşirov qeyd edib ki, idman cəmiyyətlərində dərs saatlarında yeniyetmə və gəncləri milli qürur, vətənə məhəbbət və sədaqət, etik və estetik tərbiyə, milli və döyüş ruhunu, vətənin müdafiəsində fiziki və psixoloji cəhətdən hazırlanması ən vacib məsələlərdən biridir.