Azərbaycan xalqına və insanlığa qarşı törədilmiş dəhşətli cinayət
Gənc Vətənpərvərlər Birliyi 20 Yanvar faciəsinin növbəti ildönümü ilə əlaqədar "20 Yanvar faciəsi Azərbaycan xalqına və insanlığa qarşı törədilmiş dəhşətli cinayətdir” mövzusunda tədbir keçirib.
Əvvəlcə ulu öndər Heydər Əliyevin və şəhidlərin ruhu bir dəqiqəlik sükutla yad edilib. Tədbiri giriş sözü ilə açan təşkilatın rəhbəri Muğan Əliyev bildirib ki, 20 Yanvar faciəsindən 26 il ötməsinə baxmayaraq, həmin o məşəqqətli günlər hər birimizin yaddaşına əbədi həkk olunub: "Həmin gün Azərbaycan tarixində qanla yazılmış bir səhifədir, ancaq təkcə faciə deyil. Bu tarix Azərbaycanın istiqlal yolunun ilk zirvəsi, milli məfkurəmizin azadlıq istəyinin oyanış günü idi. 1990 - cı ilin 20 yanvar günü uzun illər Sovet imperiyasının əsarətində yaşayan xalqın azadlıq səsini ucaltdığı, öz suverenliyi uğrunda cəsarət nümayiş etdirdiyi şərəfli bir tarixdir”. M.Əliyev vurğulayıb ki, 20 yanvar hadisələrinə ilk dəfə siyasi-hüquqi qiyməti məhz Ümummilli lider Heydər Əliyev verib.
Tədbirdə çıxış edənlər 20 Yanvar faciəsi qurbanlarının Azərbaycanın istiqlaliyyəti yolunda şəhid olduqlarını və onların işıqlı xatirəsinin xalqımızın qəlbində daim yaşayacağını vurğulayıblar.
Sonra 20 yanvar faciəsinə həsr edilmiş idman tədbirlərinin və Dəyirmi masaların keçiriləcəyi haqqında məlumat verilib.
Sonda tədbir iştirakçıları Şəhidlər Xiyabanını ziyarət edib, şəhid məzarlarına gül dəstələri düzüblər.
|
